MANILA, Philippines — Nabitag ang pinakamataas na pinuno ng Communist Party of the Philippines-New People’s Army (CPP-NPA) sa Southern Tagalog Region sa isinagawang joint operation ng Joint Task Force Katagalugan (JTFK) ng militar at pulisya sa Quezon City nitong Huwebes ng umaga.
Kinilala ni Philippine Army-2nd Infantry Division (ID) Spokesman Lt. Col. Jeffrex Molina ang nasakoteng lider ng CPP-NPA na si Wigberto Villarico, may mga alyas na “Benjamin Mendoza”, “Juventud del Fiero”, “Alejandro Montalban”, “Laurence”, “Joven”, “Mark”, “Cris”, “Baylon” at “Baler”. Siya ay Kalihim ng Southern Tagalog Regional Party Committee (STRPC) at kasapi ng Political Bureau (Politburo) ng CPP-NPA-NDF.
Ayon kay Molina, nasakote si Villarico matapos matunton ang pinagtataguan nito sa Brgy. Fairview, Quezon City at inaresto sa bisa ng warrant of arrest na inisyu ni Judge Rodolfo Obnamina Jr. ng Regional Trial Court (RTC) 4th Judicial Region, Branch 64 sa Mauban, Quezon sa kasong kidnapping with murder.
Si Villarico ay nasa kustodya na ng Southern Police District kaugnay ng mga kinakaharap nitong maga kaso tulad ng extortion, pagre-recruit ng mga estudyante para gawing combatants, paglabag sa anti-terrorism law, rebelyon at kidnapping with murder.