MANILA, Philippines — Isang dating pulis ang inoobserbahan sa pagamutan matapos na pagbabarilin ng riding-in-tandem habang nagdi-jogging sa Taytay, Rizal kamakalawa.
Kinilala lang sa alyas “Eugenio” ang biktima na isang retiradong pulis, dahil sa mga tinamong tama ng bala mula sa ‘di pa batid na kalibre ng baril.
Mabilis namang tumakas ang dalawang salarin na ang isa na nagsilbing driver ng motorsiklo ay inilarawang nakasuot ng itim na helmet, itim na jacket na may puting sleeves, at itim na pantalon, habang ang isa ay nakasuot ng helmet, asul na long sleeves at printed na puti at gray na pantalon.
Sa ulat ng Taytay Municipal Police, alas-8:05 ng umaga habang nagdya-jogging ang biktima sa may Sitio Lumang Ilog sa Brgy. San Juan, Taytay nang bigla na lang siyang hintuan ng mga suspek na magkaangkas sa isang kulay itim na Honda Click motorcycle.
Kaagad umanong bumunot ng baril ang rider at pinaputukan ang biktima habang nagsilbi namang lookout ang kanyang angkas, bago sila tumakas.