MANILA, Philippines — Pinayagan ng Commission on Elections (Comelec) ang mga regional offices sa Northern Luzon, na apektado ng bagyong Julian, na palawigin ang deadline ng voter registration sa kanilang lugar.
Sa press briefing kahapon, sinabi ni Comelec chairman George Garcia na dapat sana ay magtatapos na ang panahon ng rehistruhan para sa 2025 National and Local Elections (NLE) kahapon, Setyembre 30, at wala na silang planong palawigin pa ito.
Gayunman, nagpasya aniya silang i-extend ang deadline sa ilang lugar, partikular na sa Northern Luzon na binabayo ng bagyong Julian.
“Kaya binigyan namin ng authority ang aming regional offices doon. Nasa kanilang discretion kung ‘di ipagpapatuloy ngayong araw na ito ang registration of voters upang ito ay ma-i-reset sa ibang araw,” aniya.
Kaugnay nito, inianunsiyo na rin ni Garcia na pormal nang magsisimula ang filing ng Certificate of Candidacy (COC) para sa 2025 NLE ngayong Martes, Oktubre 1 at nakatakda itong magtapos sa Oktubre 8.