Higit P.2 milyong shabu nasabat sa Valenzuela

MANILA, Philippines — Umaabot sa mahigit P.2 milyong halaga ng shabu ang nasamsam ng mga awtoridad mula sa isang ‘tulak’ sa ikinasang buy-bust operation sa Valenzuela City, Biyernes ng umaga.

Sa report ni Valenzuela City police chief PCol. Nixon Cayaban kay Northern Police District (NPD) Director PBGen. Rizalito Gapas, nakilala ang drug suspect na si  alyas Gie, 57.

Ayon kay Col. Cayaban, nakatanggap ng impormasyon ang mga operatiba ng Station Drug Enforcement Unit (SDEU) sa ilalim ng pa­ngangasiwa ni PCapt. Joan Dorado hinggil sa umano’y pagbebenta ng suspek ng shabu.

Nang maikasa ang transaksiyon agad na  tinungo ng mga operatiba ng SDEU sa pangunguna ni PLt. Johnny Llave ang buy-bust operation na nagresulta sa pagkakaaresto sa suspek dakong alas-6:15 ng umaga sa Liwayway St. Brgy. Marulas.

Binentahan ng suspek ang  pulis na poseur buyer ng  P7,500 halaga ng shabu.

Nakumpiska sa suspek ang apat plastic sachets na naglalaman ng hinihinalang shabu na nagkakahalaga ng P238,000, buy-bust money na isang P500 bill at pitong P1,000 boodle money, P200 recovered money, cellphone at coin purse.

Sinabi naman ni PMSg. Ana Liza Antonio, kasong paglabag sa Sections 5 at 11 sa ilalim ng Art. II ng RA 9165 o ang Comprehensive Dangerous Drug Act of 2002 ang isasampa nila laban sa suspek sa Valenzuela City Prosecutor’s Office.