MANILA, Philippines — Isang lalaki ang sugatan sa sunog na sumiklab sa Tondo, Manila kahapon ng madaling araw dahil umano sa isang nag-overheat na electric fan.
Ang biktimang si Alvin Regalado, 42, ay nagtamo ng minor laceration sa kaliwang punong braso at 2nd degree burn sa kaliwang nipple at nostril.
Batay sa ulat ng Manila Bureau Fire of Protection (BFP), dakong alas-3:23 ng madaling araw nang magsimulang sumiklab ang sunog sa tatlong palapag na tahanan ni Regalado na matatagpuan sa 400 E Capulong St., sa Tondo.
Umabot lamang naman sa unang alarma ang sunog na kaagad na naapula dakong alas-3:58 ng madaling araw.
Lumitaw sa imbestigasyon ng mga awtoridad na isang nag-overheat na electric fan ang posibleng pinagmulan ng sunog.
Sa pagtaya ng mga awtoridad, aabot lamang sa P22,500 ang halaga ng mga ari-ariang napinsala sa sunog.