Ex-DOH secretary Garin, iba pa abswelto sa dengvaxia case

MANILA, Philippines — Ibinasura ng Quezon City Regional Trial Court (RTC) Branch 229 ang kasong kriminal na isinampa kay dating Health Secretary Janette Garin at iba pang doctor na may kinalaman sa paggamit ng dengvaxia vaccines.

Sa ipinalabas na desisyon ni QC RTC branch 229 Presiding Judge Cleto Villacorta III, sinabi nitong bigo ang prosekusyon na makapagbigay ng matibay na ebidensya laban kina Garin matapos mapatunayan na hindi mga totoong eksperto sa dengvaxia ang mga taong iniharap sa korte.

“The prosecution evidence failed to establish a prima facie case against Demurrant Janette L. Garin and Demurrant Julius Lecciones. The evidence does not amount to proof beyond a reasonable doubt of any or all of the criminal charges against either or both of them. The testimonies of Dr. Clarito Cairo, Dr. Tony Leachon, and Dr. Erwin Erfe were inadmissible,” nakasaad sa desisyon ni Judge Villacorta.

Nagsampa ng kasong kriminal ang mga magulang na namatayan ng anak nang turukan ng naturang bakuna.

“I cannot rely upon Dr. Cairo, Dr. Leachon and Dr. Erfe because their respective opinions on what Demurrant Garin should and should not have done is not evidence. They should first be qualified as an expert Witness on what a Secretary of Health ought to have done or ought not to have done in fairly similar circumstances as this Demurrant was facing,” saad ng desisyon.

“Expert witnesses have a special duty to the court to provide fair, objective, and non-partisan assistance. A proposed expert who is unwilling or unable to comply with this duty is not qualified to give expert opinion evidence,” saad pa sa korte.

Binigyang diin ng Korte na bagamat may mga ebedensiya na ang mga batang naturukan ng Dengvaxia ay walang ibang sakit, ang death certificates at pathologist ay dapat naidokumento.

Hindi rin umano nasunod ang immunization guidelines ng Department of Health sa pagturok ng bakuna kahit na may instruction hinggil dito na magsagawa muna ng screening bago bakunahan ang mga bata. Isa din sa guidelines na dapat sundin na ang  mga health professionals ang magsasagawa ng bakuna pero sa kasong ito, karamihan sa mga biktima ay binakunahan ng mga barangay workers na hindi naman otorisado na gumawa para dito.

Samantala, ikinatuwa naman ni Congresswoman Garin ang pagkakadismis sa kaso dahil patulay lamang anya ito na wala siyang kasalanan sa Dengvaxia case at walang nilalabag na batas hinggil dito.