MANILA, Philippines — Todas ang isang engine cadet nang maipit sa pagitan ng mga container van sa wagon deck area ng isang barko, na nakadaong sa pier sa Tondo, Manila kamakalawa.
Kinilala ang biktima na si Mark Brian Bacani, 23, Engine Cadet at residente ng Woodstock Homes, Alapan 1-A, Imus, Cavite.
Kusang-loob namang sumuko sa mga awtoridad ang driver ng trailer truck na si Ronaldo Pandato, 55, ng Sampaguita Subdivision, Camarin, Caloocan City.
Lumilitaw sa inisyal na ulat ng Manila Police District (MPD) - Homicide Section na dakong alas-6:45 ng umaga, nang maganap ang insidente sa wagon deck area ng M/V Saint Francis Xavier, na nakadaong sa Pier 4, North Harbor, sa Tondo.
Nauna rito, dumaraan lang umano ang biktima sa pagitan ng mga container van, nang aksidente itong maipit ng trailer truck, na noon ay minamaniobra ni Pandato.
Mabilis naman umanong isinugod ang biktima sa Mary Johnston Hospital ngunit nasawi rin.