Lalaking nagpositibo nagpa-derma, nakipagtalik pa sa spa sa Quezon City
MANILA, Philippines — Patuloy na sinusubaybayan ng Quezon City LGU ang pitong taga-lungsod na kabilang sa 40 katao na nagkaroon ng close contact sa isang lalaki na nagpositibo sa Mpox na hindi naman taga-QC.
Sa press conference, sinabi ni QC Mayor Joy Belmonte na ang pasyente na nagpositibo sa Mpox ay nagpamasahe sa isang SPA Center sa E. Rodriquez sa QC.
Anya sa naturang SPA center ay may 10 empleyado at 3 dito ay taga-QC.
Binanggit pa ng alkalde na ang naturang Spa ay naipasara na ng pamahalaang lungsod dahil sa wala itong sanitary permit, expired business permit at walang health permit ang mga tauhan.
Noong August 11 na magpa-Spa ang naturang pasyente, may 27 client ang establisimiento at dito ay 4 ang taga-QC.
Sinabi ni Mayor Belmonte na ang 3 taga-QC na empleyado ng SPA ay binigyan ng financial assistance para may panggastos habang wala pang trabaho.
Sinabi ni Dr. Rolando Cruz ng City Epidemiology and Surveilance Unit (CESU) na ang naturang pasyente makaraang magpa-SPA sa QC ay nagpunta naman ng Derma Clinic ng August 15 dahil sa mga rashes sa kanyang katawan.
Dito nakumpirma na mayroon itong Mpox at ito ngayon ay nasa ilalim ng pangangalaga ng RITM ng Department of Health.
Sinabi ni Dr Cruz na ang pasyente ay hindi taga-QC na nasa RITM na ay nagkaroon ng sexual encounter sa naturang Spa at napatunayang may prolong closed contact.
Ang nagmasahe sa pasyente ayon kay Dr Cruz ay inaalagaan na ng LGU kung saan ito nakatira.
Ang 3 empleyado ng Spa at 4 na client ng QC ay nasa home isolation at naka-close monitoring ng QC LGU.
Sinabi ni Dr Cruz na delikado ang Mpox pero mas mabilis itong maihawa sa skin to skin contact.
Pinaalalahanan ni Mayor Belmonte ang publiko lalo na ang mga taga-QC na ingatan ang kalusugan upang maiwasan na magkasakit.