MANILA, Philippines — Isang ginang ang nasawi nang masagasaan ng isang trailer truck sa Paco, Manila, nabatid kahapon.
Inaalam pa ng mga awtoridad ang pagkakakilanlan sa biktima na inilarawan lamang na nasa 40 hanggang 50-anyos, nakasuot ng pulang t-shirt at puting shorts habang arestado naman ang driver na suspek na si alyas ‘Rey,’ 34.
Batay sa ulat ng Paco Police Community Precinct- Station 5 ng Manila Police District (MPD), dakong alas-4:30 ng Huwebes, Agosto 16, sa San Marcelino St., sa Paco ngunit nitong Linggo lamang ito naiulat.
Binabagtas umano ng truck ang naturang kalsada nang bigla na lang tumawid ang biktima.
Kaagad naman umanong nakapagpreno ang driver ng truck ngunit nasagasaan at naipit na rin ang biktima sa pagitan ng gulong nito.
Kusa namang sumuko ang driver sa mga pulis at sasampahan na ng kasong reckless imprudence resulting in homicide sa piskalya.