‘College education behind bars’ ng BJMP palalawakin pa

MANILA, Philippines — Tiniyak ng Bureau of Jail Management and Penology (BJMP) na mas palawakin nila ang kanilang ‘college education behind bars’ sa bansa.

Ayon kay BJMP Director Ruel Rivera,  ang ‘college education behind bars’  ay layong maisakatuparan ng mga persons deprived of li­berty ang kanilang pa­ngarap na makatapos ng kanilang pag-aaral.

Sinabi ni Rivera na hindi hahadlangan ng kawanihan ang pa­ngarap ng bawat PDL na makapag-aral para sa kanilang kinabukasan.

Ang mga PDL na nasa pangangalaga ng BJMP ay hindi pa convicted.

Batay sa kanilang datos,  sinabi ni Rivera na nasa  425 ang nasa kolehiyo kung saan  294 ang lalaki at  131 naman ang babae.

Napag-alaman na nangunguna ang Baliwag City Jail  na may 40 college students na sinundan ng Quezon City Jail Female Dorm at Sta. Rosa City  Male Dorm na may 39 enrollees at Davao City Jail na may 36 enrollees.

Dalawa ang ­inaasahang magtatapos ngayong Agosto 2024, anim sa 2025, lima sa 2026, walo sa 2027, at isa sa 2028.

Wala ring pinag-iba ang mga kurso sa kanilang ‘college  education behind  bars’ program sa mga kurso sa mga unibersidad,

Umaasa si Rivera na dadami pa ang sasailalim sa ‘college  education behind  bars’ dahil prayoridad ng BJMP re­formation ng bawat PDL.