MANILA, Philippines — Nakatakdang maglunsad ng panibagong transport strike ang grupong Manibela kasabay na rin nang nakatakdang pagdaraos ng ikatlong State of the Nation Address (SONA) ni Pang. Ferdinand Marcos Jr. sa Batasang Pambansa sa Quezon City.
Ayon kay Manibela chairperson Mar Valbuena, aabot sa 4,000 miyembro nito sa Metro Manila ang makikiisa sa transport strike na ikakasa nila laban sa Public Utility Vehicle Modernization Program (PUVMP) ngayong araw.
Nabatid na sisimulan ng grupo ang kanilang protesta ngayong tanghali, sa tanggapan ng Commission on Human Rights (CHR) sa Diliman, Quezon City.
Bukod sa Metro Manila, inaasahang magdaraos din ang Manibela ng transport strike sa Baguio City; Pangasinan; Naga City, Camarines Sur; at maging sa Visayas at Davao Region.
Una nang inianunsiyo ni Pang. Marcos na hindi na palalawigin pa ng pamahalaan ang PUV consolidation na unang bahagi ng PUVMP, na nagtapos na noong Abril 30, 2024.
Ang lahat naman ng mga PUVs na bigong mag-consolidate sa korporasyon o kooperatiba ay ikokonsidera nang kolorum ng mga awtoridad kaya’t maaari nang hulihin sa sandaling bumiyahe at mamasada.