19 kilo pa ng shabu nabingwit sa Ilocos Sur
MANILA, Philippines — Tila hindi natatapos ang mga nasasamsam na shabu sa Ilocos Sur nang isang itim na sako na naglalaman ng 19 na pakete ng shabu na tumitimbang ng 19 kilo ang nabingwit ng dalawang mangingisda sa karagatang sakop ng Barangay Puro, Magsingal, Ilocos Sur kamakalawa ng umaga.
Unang nadiskubre nitong Hunyo 24 sa Brgy. Solotsolot, San Juan, Ilocos Sur ang palutang-lutang na 24 pakete ng shabu na may Chinese markings na nasundan ng 18 pang pakete ng illegal na droga sa territorial waters ng Villamar, Caoayan sa nasabi ring lalawigan.
Isinurender na ng dalawang mangingisda sa Philippine Drug Enforcement Agency (PDEA), Philipine National Police-Ilocos Sur Provincial office (PNP-ISPO), Magsingal Municipal Police Station, PNP Maritime at Philippine Coast Guard, ang sako na umano’y naglalaman ng 19 na pakete ng shabu.
Batay sa ulat ng PDEA, dakong alas-6 ng umaga nitong Huwebes nang makitang palutang-lutang ng mga mangingisda na sina Ian Jake Tiqui, 20, at Rommel Oxciano, 31, kapwa residente ng Sitio Nagpartian Brgy. Puro, Magsingal Ilocos Sur ang sako na naglalaman ng 19 na transparent pack ng puting crystalline substance o shabu.
Samantala, pagkakalooban naman ng Ilocos Sur Provincial government ng tig-P50,000 ang dalawang mangingisda na nagsurender sa mga illegal na droga bilang pabuya habang P5,000 naman kada pakete ang ibibigay ng PDEA.
Nasa pag-iingat na ng PNP Ilocos Sur ang mga droga habang patuloy pa ang imbestigasyon sa pinagmulan nito.
- Latest
