‘No court order, No release’ ipatutupad ng LTO!

Sa na-impound na colorum vehicles

MANILA, Philippines — Higit pang pinaigting ng Land Transportation Office (LTO) ang kampanya laban sa mga colorum vehicles at ipatutupad ang “No court order, No release” policy.

Ito ay makaraang balaan ni LTO Chief ­Vigor Mendoza ang mga colorum vehicle owners na oras na makum­piska ang sasakyan at ma-impound, hindi ito agad-agad maipalalabas sa bakuran ng LTO hangga’t walang kaukulang utos mula sa korte.

“Masyado nang matagal at malalim ang problema sa iligal na operasyon ng colorum vehicles sa ating bansa. Kailangan na nating magpatupad ng mas mabigat na kaparusahan tungkol dito upang maipakita sa mga taong patuloy na nilalabag ang batas na seryoso ang ating pamahalaan upang tapusin ang modus nila,” sabi ni Mendoza.

Sinasabi ng transport groups na nawawala ang kanilang 30 percent ng kita dahil sa mga colorum na sasakyan. Ang colorum na sasakyan ay isang pribadong sasakyan na ginagamit ng may-ari nito bilang isang pampasaherong sasakyan para kumita.

“Simple lang po ito: May mga regulasyon patungkol sa operation ng public utility vehicles. Kung hindi po ito sinunod, maliwanag na iligal po ang operasyon nito and this is equivalent to committing a crime. Kaya may karampatang parusa at multa dito. At kasama sa parusa dito ay ang pagpapatupad natin ng no release policy for all vehicles that would be impounded in anti-colorum operations,” dagdag ni Mendoza.

Kaugnay nito, nagpalabas ng kautusan si Mendoza sa lahat ng Regional Directors, District Office heads at hepe ng LTO units na kasuhan ng kriminal ang mga nahuhuli sa kanilang mga anti-colorum operations.

Habang nakabinbin ang kasong kriminal, ang sasakyan ay hindi aniya maipalalabas sa bakuran ng LTO hangga’t walang court order.