Selda nilagare sa kasagsagan ng ulan
MANILA, Philippines — Sinibak sa puwesto ang limang tauhan ng Parang Municipal Police Station (MPS) sa Maguindanao del Norte matapos na limang preso ang nakatakas sa kanilang detention cell nitong Sabado ng madaling araw.
Sa ulat na ipinadala sa PNP Headquarters sa Camp Crame ni Lt. Col. Erwin Tabora, hepe ng Parang MPS, nilagare umano ng mga preso ang center lock ng kanilang detention cell upang makatakas.
Itinaon umano ang paglagare at pagtakas sa kasagsagan ng malakas na ulan kaya hindi napansin ng naka-duty na pulis.
Samantala, apat sa mga tumakas na preso ang naibalik na sa kulungan sa isinagawang hot pursuit operation ng pulisya habang isa pa ang patuloy na pinaghahanap na may kasong murder.
Ang limang sinibak na pulis ay nasa holding unit na ng Maguindanao del Norte Police Provincial Office (PPO).
Nabatid na si Tabora ay kakalipat lang bilang bagong hepe ng Parang Police Station kung saan pinalitan nito si dating chief of police Lt. Col. Christopher Cabugwang.