MANILA, Philippines — Limang katao ang sugatan nang sumiklab ang sunog sa isang residential area sa San Nicolas, Maynila kahapon.
Dalawa sa mga nasugatan ay mga bumbero na nakilalang sina FO2 Ralph Albert Cabuag, 24, na nagtamo ng 2nd degree burn sa dalawang kamay at FO1 Kyll Medrano, 25, na nagtamo ng 2nd degree burn sa kanang hinlalaki.
Sugatan din naman sina Jasper Lucas, 31, na nagtamo ng 2nd degree burn sa kanang kamay; Raiza Contreraz, 17, na nagtamo ng laceration sa kaliwang kilay at Marlon Dela Cruz, 21, na nagtamo ng sugat sa kaliwang palad.
Batay sa ulat ng Manila Bureau of Fire Protection (BFP), dakong alas-11:33 ng umaga nang sumiklab ang sunog sa residential area sa Parola Area-C sa San Nicolas.
Umabot ng ikatlong alarma ang sunog bago tuluyang naideklarang under control dakong alas-12:55 ng tanghali. Tuluyan naman itong naapula dakong ala-1:13 ng hapon.
Nagsasagawa ng imbestigasyon ang mga awtoridad upang mabatid kung ilang pamilya ang naapektuhan sa sunog at halaga ng mga ari-ariang tinupok, gayundin ang pinagmulan nito.