Mahigit 1,400 pulis, ikakalat sa Chinese New Year
MANILA, Philippines — Aabot sa 1,457 mga pulis ang ikakalat ng Philippine National Police (PNP) para sa pagdiriwang ng Chinese New Year sa Sabado.
Ayon kay PNP Chief, PGen. Benjamin Acorda Jr., layon nitong matiyak ang seguridad ng Filipino-Chinese Community na sasalubungin ang Lunar New Year o ang pagpasok ng Year of the Wood Dragon.
Aniya, partikular na tututukan ang Chinatown na nasa Binondo, Maynila.
Nabatid na maliban sa Lunar New Year ay ipagdiriwang din ng Filipino-Chinese Community ang ika-430 anibersaryo ng pagkakatatag ng kanilang komunidad sa labas ng mainland China.
Giit ng PNP, naka-monitor sila sa posibleng mga krimen na lumaganap sa gitna ng nasabing pagdiriwang.
Partikular na tinukoy ni Acorda ang snatching at pandurukot sa gitna ng maraming tao.
Dagdag ni Acorda, nagbigay na siya ng kautusan sa lahat ng kanyang mga Chief of Police upang masiguro ang kaligtasan ng publiko at Filipino Chinese Community.
- Latest
