Pista ng Sto. Niño de Tondo dinagsa, naging mapayapa

MANILA, Philippines — Naging mapayapa ang pagdaraos ng pista ng Santo Niño de Tondo sa Maynila kahapon, na dinagsa ng libu-libong deboto.

Batay sa ulat, dakong alas-3:00 ng madaling araw pa lamang ay dumagsa na ang mga deboto ng Santo Niño sa Tondo Church upang dumalo sa banal na Misa at Maringal na Prusisyon.

Dakong alas-4:00 ng madaling araw nang umarangkada ang prusisyon, na nilahukan ng iba’t ibang karosa ng mga Santo Niño at libu-libong deboto na may bitbit ding mga imahe ng Santo Niño de Tondo.

Nagkaroon din ng mga banal na misa na idinaos kada oras para sa Santo Niño de Tondo. Sinimulan ang pagdaraos ng misa simula alas-12:00 ng ha­tinggabi hanggang alas-11:00 ng gabi nitong Linggo.