MRT-3, handa na sa ‘Oplan Biyaheng Ayos’
Para sa BSKE at undas
MANILA, Philippines — Tiniyak kahapon ng pamunuan ng Metro Rail Transit Line 3 (MRT-3) na handang-handa na sila para sa ikinakasang ‘Oplan Biyaheng Ayos,’ bilang preparasyon sa pagdaraos ng 2023 Barangay at Sangguniang Kabataan Elections (BSKE) at ng Undas.
Sa isang abiso, siniguro rin ng MRT-3 na mas pinaigting pa nila ang seguridad sa buong linya, alinsunod na rin sa direktiba ng Department of Transportation (DOTr) na siguruhing sapat at ligtas ang pampublikong transportasyon sa eleksyon sa Oktubre 30 at sa panahon ng Undas.
“Sinimulan na po natin ang pagpapairal ng mas mahigpit na seguridad sa MRT-3 upang matiyak ang tuloy-tuloy at ligtas na biyahe ng mga pasahero sa eleksyon at Undas,” saad ni DOTr Assistant Secretary for Railways at MRT-3 Officer-in-Charge Jorjette B. Aquino.
“Gayundin po, mayroon po tayong sapat na bilang ng mga kawani na handang umagapay sa mga pasahero at aksyunan ang kanilang mga hinaing kung kinakailangan,” aniya pa.
Dagdag pa ni Aquino, tuluy-tuloy rin ang maayos na pangangalaga nila sa kanilang mga bagon at ang pagde-deploy ng sapat na bilang ng mga tren upang mapagserbisyuhan ang mga pasahero lalo na sa kasagsagan ng barangay at SK elections at Undas.
Sa kasalukuyan aniya ay mayroong 18 train sets na tumatakbo sa linya tuwing peak hours at nasa tatlo hanggang apat naman ang spare trains.
- Latest
