Dating LTFRB executive assistant Tumbado, sumulpot na sa NBI
MANILA, Philippines — Sumulpot na kahapon sa National Bureau of Investigation (NBI) ang dating executive assistant ng Land Transportation Franchising and Regulatory Board (LTFRB) na si Jeff Tumbado na naunang nagbulgar ng katiwalian sa tanggapan.
Sa isinumiteng sworn affidavit sa NBI ay pinabulaanan niya ang mga paratang na siya ay pinatalsik ni suspended LTFRB Chairman Guadiz dahil nanghihingi siya ng pera sa transport groups.
Sinabi rin nito sa kayang affidavit na dati na ring siyang naging tauhan sa LTO ni Guadiz noong ito pa ang LTO chief at naisama sa LTFRB noong ito ay maging LTFRB chairman bilang executive assistant sa opisina nito.
Nagkaroon umano siya ng hindi pagkakaunawaan sa isa pang tauhan ni Guadiz sa LTFRB na si Marie Jho Borja at sinabi niya ito kay Guadiz pero hindi siya pinakinggan at hindi kinausap nito.
Anya napasok siya sa LTFRB noong January 2023 at nag-resign noong Setyembre 2023.
Sumama umano siya sa press conference ng transport group na Manibela noong October 9 at doon sinabi ang mga sama ng loob at iregularidad sa LTFRB.
Makaraan umano ng press conference ay kinausap siya ni Guadiz at hiningi sa kanya na ibalik ang magandang reputasyon at ito anya ang dahilan ng kanyang recantation.
Niliwanag pa ni Tumbado sa kanyang affidavit sa NBI na hindi niya inaasahan ang mga nagawa at hindi niya ito intensyon. Sa huli anya ng pag-uusap nila ni Guadiz ay nagkapatawaran sila sa isat isa.
Inamin ni Tumbado na hindi ligtas sa bahid ng korapsyon ang LTFRB kaya’t siya ay nanawagan sa kinauukulan na imbestigahan ito.
Nilinaw din niya na ang korapsyon sa LTFRB ay hindi umaakyat sa DOTr at Malakanyang.
- Latest