Meralco, ready na sa BSKE
MANILA, Philippines — Handang-handa na ang Manila Electric Company (Meralco) upang magbigay ng serbisyo para sa idaraos na October 30, 2023 Barangay and Sangguniang Kabataan Elections (BSKE).
Ayon kay Meralco Spokesperson Joe Zaldarriaga, nakaalerto ang Meralco 24/7, sa araw ng halalan, upang rumesponde sa anumang distribution related problems, hanggat hindi pa natatapos ang proseso ng eleksiyon.
Nakaantabay na rin aniya ang kanilang mga tauhan upang tumugon sa anumang electricity service concern sa panahon ng halalan.
Nabatid na nakapag-inspeksiyon na rin ang Meralco ng kanilang mga electric facilities na malapit sa may 3,000 polling at canvassing centers.
Samantala, mahigit sa 300 generator sets at halos 800 floodlights na anila ang nakaantabay sa ngayon na maaaring magamit sakaling magkaroon ng mga hindi inaasahang power interruption.
Kaugnay nito, pinaalalahanan din ng Meralco ang personnel na magbabantay sa mga polling at canvassing centers na iwasan ang pagsasaksak ng mga hindi kinakailangang appliances, gayundin ang mga “octopus” connections na maaaring magresulta sa overloading.
Hinikayat din ng electric company ang publiko na iwasan ang paggamit ng mga lobo, firecrackers, confetti, party poppers, at mga kahalintulad nito, malapit sa linya at pasilidad ng Meralco upang maiwasan ang line tripping at power interruptions.
- Latest
