‘Banda ng Maynila’ ia-upgrade ng Manila LGU

MANILA, Philippines — Mismong si Manila Mayor Honey Lacuna na ang nagkumpirma na plano ng pamahalaang lungsod na i-upgrade ang mga musical instruments ng Manila City Band, o mas kilala bilang ‘Banda ng Maynila’.

Ang magandang ba­lita ay inanunsiyo mismo ng alkalde nang pangunahan ang pagdiriwang ng ika-60 anibersaryo ng “Banda ng Maynila” na idinaos sa pamamagitan ng isang konsiyerto sa Bonifacio Shrine na pinamagatang “Sisentarenata”.

Bukod kay Lacuna, ang selebrasyon ng banda ay dinaluhan nina Department of Tourism Culture and Sports of Manila (DTCAM) director Charlie Dungo, Vice Mayor Yul Servo,  mga city councilors at officials, at iba pa.

Sa kanyang maikling mensahe, sinabi ni Lacuna ang plano niyang pag-upgrade sa mga musical instruments na ginagamit ng banda upang patuloy na makapaghatid ng magandang performance at makapagkaloob ng madamdaming mga musika sa mga aktibidad ng lungsod.

“Bilang pagsasara ng tabing sa pagdiriwang ng Buwan ng Turismo, bi­nibigyan natin ng halaga ang 60-taong ambag ng ating Banda ng Maynila. Anim na dekada na silang nagbibigay serbisyo sa ating lungsod sa pamamagitan ng kanilang musika na kasama sa mga mahahalagang okasyon at palatuntunan ng pamahalaang lungsod,” ayon pa sa alkalde.

Ani Lacuna, ang bawat musical performance ng Banda ng Maynila, na pinangungunahan ni Maestro Daniel Quianzon ay isang ekspresyon o pagpapahayag ng damdamin na hindi kayang ipakita ng mga salita lamang.