P505 milyong ‘puslit’ na bigas, nadiskubre sa Bulacan warehouse
MANILA, Philippines — Kasunod ng direktiba ng Pang. Ferdinand Marcos Jr. na protektahan ang agricultural assets sa pamamagitan nang pinaigting na border security, nadiskubre ng Bureau of Customs (BOC) nitong Huwebes ang may P505 milyong hinihinalang puslit na imported na bigas mula sa iba’t ibang bodega sa lalawigan ng Bulacan.
Isang team na pinamumunuan mismo ni Customs Commissioner Bien Rubio, kasama sina Customs Intelligence and Investigation Service (CIIS) Director Verne Enciso, CIIS-Manila International Container Port (CIIS-MICP) agents, at Philippine Coast Guard (PCG) Task Force Aduana, ang nag-inspeksiyon sa mga bodega ng Great Harvest Rice Mill Warehouse, San Pedro Warehouse, at FS Rice Mill Warehouse.
Ang mga ito ay matatagpuan sa Intercity Industrial Complex sa San Juan, Balagtas, Bulacan, at natuklasang naglalaman ng may 202,000 sako ng imported rice grains mula sa Vietnam, Cambodia, at Thailand.
Kasama sa isinagawang inspeksyon sa mga bodega sina House Speaker Martin Romualdez at Reps. Erwin Tulfo, Wilfrido Mark Enverga, at Ambrosion Cruz Jr. na pinasalamatan din ni Rubio.
Tinukoy naman ni Intelligence Group Deputy Commissioner Juvymax Uy ang papel ng BOC sa layunin ng administrasyong Marcos na maresolba ang isyu sa hoarding, na siyang nagtutulak upang tumaas ang presyo ng bigas sa merkado.
“If proven true, hoarding such a huge amount of rice grain will have legal consequences. There is no space in our fight against smuggling and hoarding for these kinds of operations. Together with key agencies, our commitment remains steadfast—it is time to put an end to the crippling impact of smuggling,” aniya.
Ayon kay Enciso, nakipag-coordinate ang BOC sa Philippine National Police (PNP) sa Balagtas, gayundin sa mga personnel mula sa Brgy. San Juan upang ipatupad ang Letter of Authority (LOA) na nilagdaan ni Commissioner Rubio.
Kung matuklasang walang kaukulang importation at proof of payment documents, isasagawa umano nila ang corresponding seizure at forfeiture proceedings laban sa subject shipments para sa paglabag sa Section 1400 (misdeclaration in goods declaration) in relation to Section 1113 (property subject to seizure and forfeiture) ng Republic Act No. 10863 o mas kilala bilang Customs Modernization and Tariff Act (CMTA). — Joy Cantos
- Latest
