Vendor itinumba sa Ermita
MANILA, Philippines — Patay ang isang 36-taong gulang na vendor makaraang malapitang barilin ng nag-iisang salarin lulan ng isang motorsiklo sa isang kalsada sa may Ermita, Maynila kahapon ng madaling araw.
Nakilala ang nasawi na si William Lloyd Fernandez, binata, ng Riverside 2, Brgy. 159-A, Ermita.
Sa ulat ng Manila Police District, dakong alas-4:10 ng madaling araw nang makarinig ng mga putok ng baril sa Arroceros St., sa Riverside 2, Ermita.
Ayon sa saksi na nang kanyang tignan ang pinagmulan ng putok, nakita niya ang isang lalaki na may suot na naka-full face mask na tumakas sakay ng isang motorsiklo habang duguan na nakahandusay ang biktima.
Blangko ang mga awtoridad sa tunay na motibo sa pamamaslang, ngunit may usap-usapan na naging testigo umano sa isa pang pamamaslang ang biktima na naganap noong nakalipas na linggo.
- Latest
