Tren nadiskaril sa Makati

MANILA, Philippines — Nadiskaril ang isang tren ng Philippine National Railways (PNR) habang bumibiyahe ito sa may Makati City, kahapon ng umaga.

Ayon kay PNR ­operations manager Jo Jeronimo, naganap ang insidente dakong alas-11:30 ng umaga.  Galing ang tren sa Tutuban sa Maynila at patungo ng Alabang sa Muntinlupa nang madiskaril ang unahang bahagi nito sa riles.

Dahil dito, sumadsad ang train head sa graba at lupa habang nanatili naman ang ibang bagon sa riles.

Agad namang rumes­ponde ang mga tauhan ng Makati City Police at train marshalls sa lugar ng insidente.

Masuwerte namang walang naiulat na malubhang nasaktan sa pangyayari.
Nagdulot naman ang insidente ng mabigat na trapiko sa Quirino Highway. — Mer Layson