MANILA, Philippines — Dinagsa na ng libu-libong deboto ng Itim na Poong Nazareno ang ‘Pagpupugay’ na isinasagawa sa Quirino Grandstand sa Maynila na tatagal hanggang sa Lunes (Enero 9).
Hindi naging hadlang sa mga deboto ang klima at pagpapalit sa tradisyunal na ‘Traslacion’ at ‘Pahalik’ na ngayon ay ginawang ‘Pagpupugay’.
Halatang sabik matapos ang dalawang taon, na muling makapagpahid ng panyo o tuwalya at mahawakan ang imahe ng Poong Nazareno, hindi tulad noong mga nakalipas na may ‘Pahalik”, bilang pag-iingat sa banta ng COVID-19.
Maayos ang pila at pawang nakasuot ng face masks ang mga deboto.
Ang unang misa ay pinangunahan ni Rev. Fr. Hans Magdurulang na nagsabi sa kanyang homiliya na ang Quirino Grandstand ay ang lugar kung saan nasaksihan ng mundo hindi lang ang milyun-milyong deboto kundi maging ang matibay na pananampalataya ng mga Pilipino sa Itim na Nazareno.
Ayon sa Manila Police District (MPD), kahit mahigit sa libong deboto ang nagsipila ng madaling araw ay hindi naman gaano siksikan dahil pagkatapos na manalangin ay nagsisiuwian na rin.
May hiwalay naman na pila para sa persons with disability, senior citizens, at mga buntis.
Ngayong Linggo naman ay isasagawa ang Walk of Faith.
Samantala, sa Quiapo Church o Minor Basilica ay patuloy lang sa pagdagsa ang mga deboto.