Senior citizen, patay sa bundol ng e-trike

MANILA, Philippines — Patay ang isang se­nior citizen habang sugatan naman ang kaniyang misis makaraang mabundol sila ng dalawang e-trike habang tumatawid sa isang kalsada sa Ermita, Maynila nitong nakaraang Lunes ng umaga.

Nakilala ang nasawi na si Jesus Garcia, 73, ng Altura Extension, Sta. Mesa, Maynila. Sugatan naman ang kaniyang misis na si Elizabeth Garcia, 68.

Samantala, hawak ngayon ng pulisya ang mga suspek na sina Paul Patrick Lacanaria, 34, Bagong Lupa, Baseco, Port Area; at si Alfredo Acedilla, 56, ng Manila Habitat, Baseco Port, Area, Maynila.

Sa ulat ng Manila Police District-Traffic Enforcement Unit, dakong alas-9 ng umaga nang maganap ang insidente sa eastbound lane ng Kalaw Avenue sa Ermita.

Tumatawid ng kalsada ang dalawang matanda nang unang mabundol sila ng e-trike na minamaneho ni Lacanaria dahilan para bumagsak ang mga ito.  Sumunod na nabundol muli si Jesus ng e-trike na minamaneho naman ni Acedilla dahilan ng matinding pinsala sa kaniya. Mabilis na rumes­ponde sa insidente ang mga tauhan ng Manila Disaster Risk Reduction Ma­nagement Office at isinugod ang dalawang matanda sa Philippine General Hospital kung saan agad silang nilapatan ng lunas. Dakong alas-3:10 ng hapon nang ideklarang nasawi si Jesus Garcia dahil sa matinding pinsala na tinamo nito.

Nakaditine ngayon sa MDTEU detention center ang mga suspek na nahaharap ngayon sa kasong Homicide at Physical Injury through Reckless Imprudence sa Manila City Prosecutors Office.