Minor, natukoy na nag-‘bomb threat’ sa iskul sa Taguig

MANILA, Philippines— Isang menor-de-edad ang natukoy ng pulisya na nasa likod ng isang Facebook account na nagbantang magpapasabog sa isang eskwelahan sa Taguig City, noong Nob­yembre 7,2022.

Ayon sa Philippine National Police-Anti-Cybercrime Group natukoy na ang nagbanta ay isang babae ring mag-aaral sa Signal Village National High School.

Magugunitang dahil sa pagbabanta, sinuspinde ang mga klase sa paaralan.

Matapos naman ang ginawang pananaliksik walang nakita na anumang uri ng bomba sa loob ng iskul.

Nag-ugat ang pagsuspinde sa klase ng isang mensahe ang natanggap ng paaralan mula sa isang FB user na “Sofia Smith” na nagsagawa ng bomb threat.

Binanggit pa nito ang mga katagang: “Kagaya ng nangyari sa Thailand humanda kayo magpapasabog ako diyan sa signal, papatayin ko kayong lahat.”