MANILA, Philippines — May nakalaang pinakamalaking badyet sa tren na P113.99 bilyon o halos limang beses kumpara sa P23.12 bilyon lamang ngayong 2022, ang 2023 panukalang P5.268 trilyong ‘National Expenditure Program’ (NEP) ni Pangulong Ferdinand Marcos Jr.
Ayon kay Albay Rep. Joey Sarte Salceda, chairman ng House Ways and Means Committee na, sa ilalim ng 2023 NEP na isinumite sa Kamara, ‘idinedeklara ni Pangulong Marcos na balik na ang tren bilang mahalagang transportasyon at inihudyat na niya ang pasimula sa programang “Build Better More.”
Bilang pangunahing may-akda ng ‘House Resolution’ na pormal na nagsusulong sa ‘infrastructure spending targets’ at nagbigay dito ng pangalang “Build Better More” (BBM), sinabi ni Salceda na hudyat din ito na sadyang itinutulak ni Pangulong Marcos ang ‘national backbone projects,’ ang pamanang mga imprastraktura sa mga rehiyon at lalawigan ni dating Pangulong Duterte.
Pinuna ni Salceda na habang ang estratehiya ni PRRD ay ilipat sa mga lalawigan ang yaman ng bansa, ang kay PBBM naman ay gawing lalong kapaki-pakinabang ang mga ito sa pamamagitan ng mabisang pag-uugnay sa kanila ng lalong pinalawak sa saklaw ng mga riles at tren.
Anya, ang panukalang 2023 badyet ay “tiyak na magpapasimula na sa paggulong ng ‘Build Better More era,’ at ang tren ay tiyak din na pinaka-murang sistema ng transportasyong panglupa bawat kilometro, para sa mga tao man o kargada, at maliwanag na marami nito ang gusto ng Pangulo.”