MANILA, Philippines — Patay ang isang hindi pa nakikilalang lalaki makaraang malaglag buhat sa itaas ng isang condominium building sa Ermita, Maynila kahapon ng madaling araw.
Patuloy na inaalam ng mga imbestigador ang pagkakakilanlan sa nasawi na natagpuang walang buhay dakong alas-5:40 ng madaling araw sa ibaba ng condominium building na nasa kahabaan ng Adriatico Street sa Ermita.
Sa ulat, nakatanggap ng tawag ang J. Bocobo Police Community Precinct ukol sa insidente ng pagkahulog ng isang lalaki sa naturang condominium building.
Rumesponde ang mga pulis pero hindi na nila naabutan sa lugar ang biktima na isinugod na ng security personnel ng gusali sa Philippine General Hospital kung saan idineklara siyang wala nang buhay dakong alas-7:30 ng umaga.
Habang isinusulat ito, patuloy ang imbestigasyon ng mga pulis sa pamamagitan ng pagkalap ng impormasyon sa pamunuan ng condominium building sa pagkakakilanlan sa biktima, kung tenant siya o bisita, at kung aksidente ba o sadya itong tumalon sa gusali.