MANILA, Philippines — Naitama na ng Bangko Sentral ng Pilipinas (BSP) ang ‘spelling’ o pagbaybay at tamang ‘format’ ng siyentipikong pangalan ng Philippine eagle na tampok sa ilalabas na bagong P1,000 bill.
Ikinatwiran din ng BSP na ang larawang kumalat sa social media ay sampol lamang na ipinadala sa kanila para isailalim sa pagsusuri at hindi pa pinal.
“The BSP clarifies that the recently circulated photo of the new banknote was of a sample previously sent to the BSP for review,” pahayag ng BSP.
“Necessary corrections have already been made, including the spelling and italicizing of the scientific name of the Philippine eagle,” dagdag pa ng ahensya.
Nauna rito, ilang social media users, kabilang si Bayan Muna Rep. Carlos Zarate, ang pumuna hinggil sa ilang pagkakamali sa bagong disenyo ng ?1,000 banknote. Kabilang dito ang scientific name na ‘Pithecophega jefforyi’ na dapat ay ‘Pithecophaga jefferyi’ at dapat naka-italicized rin ito dahil sa salitang Latin.
Nitong Sabado ay isinapubliko na ng BSP ang bagong disenyo ng ?1,000 banknote na may Philippine eagle sa harapan, kapalit ng mga larawan ng mga bayaning sina Jose Abad Santos, Vicente Lim at Josefa Llanes Escoda.
Nakatakdang ilabas sa sirkulasyon ang naturang bagong banknote sa Abril 2022.