Higit 100 siklista sa Maynila sinita
MANILA, Philippines — Mahigit 100 siklista ang sinita ng Manila Police District (MPD) nitong Linggo ng Pagkabuhay habang ipinaiiral ang enhanced community quarantine (ECQ) sa NCR Plus.
Sinabi ng MPD na hindi raw mga authorized persons outside residence (APOR) ang mga siklista.
May isang siklista na nagsabing bibili lamang siya ng gamot. Ang iba naman ay mag-e-ehersisyo.
Ayon sa MPD, puwedeng mag-exercise habang may ECQ ngunit sa harap lang ng bahay o sa loob ng kani-kanilang barangay.
Pinauwi rin ang mga siklista matapos pagsabihan.
Ayon sa Malacañang, essential activity ang pag-eehersisyo ngunit ito ay dapat gawin sa sariling barangay lamang.
Ang ECQ sa NCR Plus na dapat ay isang linggo lamang at magtatapos sana nitong Linggo ng Pagkabuhay ay in-extend ng pamahalaan ng isa pang linggo o hanggang Abril 11.
Ito ay dahil sa patuloy na pagdami ng mga kaso ng COVID-19 sa NCR Plus (Metro Manila, Bulacan, Cavite, Rizal at Laguna).
Sa ilalim ng ECQ, mas limitado ang movement ng publiko upang maiwasan ang hawaan ng COVID-19. Tanging mga APOR lamang at mga may emergency ang papayagang lumabas ng kanilang mga bahay.
- Latest
