MANILA, Philippines — Dalawang hindi pa nakikilalang lalaki na pinaghihinalaang mga karnaper ang patay matapos na makipagbarilan sa mga pulis kahapon ng madaling araw sa Novaliches, Quezon City.
Kasalukuyang inaalam ng mga awtoridad ang pagkakakilanlan ng mga suspek na naka-engkuwentro ng mga pulis dakong alas-3 ng madaling araw sa Austria Street sa Barangay San Agustin.
Batay sa initial report ni P/Lt. Man Erick Felipe, hepe ng PCP 2 commander ng Novaliches, may natanggap silang report mula sa isang sibilyan na ninakawan ng motorsiklo. Humingi ng tulong ang biktima na isang alyas Richard kaya nagsagawa ng dragnet operation ang mga pulis. Nang makita ang ninakaw na motorskilo, sinita ng mga pulis ang mga suspek subalit hindi huminto kaya napilitan ang mga pulis na habulin hanggang sa umabot sa bakanteng lote sa Austria St.
Sa halip na sumuko ay agad na nagpaputok ang isa sa mga suspek kaya napilitan ang mga awtoridad na gumanti ng putok na ikinasawi ng mga suspek.
Nakuha sa mga suspek ang dalawang baril at ilang sachet ng shabu.