Gagastusin ibibigay na lang sa mga mahihirap
QUEZON CITY, Philippines — Wala nang magaganap na Christmas party sa lahat ng opisina at departmento ng Quezon City government .
Ito ay makaraang iutos ni QC Mayor Joy Belmonte ang kanselasyon sa pagsasagawa ng Christmas party at sa halip ay ibigay ang pondong gagastusin dito para sa mga mahihirap na taga-lungsod.
Sa isang memorandum, sinabi ni Mayor Belmonte na hindi maganda kung ang mga tanggapan ng city hall ay magdiriwang ng nakagawiang mga Christmas party habang ang ibang taga-lungsod ay nakakaranas ng kahirapan dulot ng epekto ng COVID-19 pandemic.
“The money that would have been spent on office Christmas parties would do more good as donations to the underprivileged during this extraordinarily difficult time in our nation’s history,” sabi ni Belmonte.
Hiniling din ni Belmonte sa lahat ng opisina at departamento sa QC hall na mag-adopt ng underprivileged sector tulad ng urban poor, displaced workers, jeepney drivers, street vendors, indigent children, poor senior citizens para maayudahan.
Kailangan nilang makipag-ugnayan sa City Social Services and Development Department para masino ang mga legitimate representative ng kanilang napiling sektor hanggang ngayong araw na ito, September 30.
Hinikayat ni Belmonte ang mga opisina at departamento na mag-donate para sa sectoral representative ng sing-halaga ng pondo na nailaan para sa kanilang Christmas party bago sumapit ang December 23, 2020.
Sa halip na mag -Christmas parties, hinimok ni Belmonte ang mga empleyado ng QC hall na ipagdiwang ang kapaskuhan sa kanilang tahanan kasama ang mga mahal sa buhay.