2 Chinese huli sa ‘underground clinic’ sa COVID
MANILA, Philippines — Sinalakay ng mga tauhan ng Makati City Police ang isang klinika na nagresulta sa pagkaka-aresto sa dalawang Chinese national na kinabibilangan ng isang doktor na gumagamot umano ng COVID-19 patients sa Makati City, kamakalawa ng hapon.
Inihahanda na ang kaukulang kasong isasampa sa Makati Prosecutor’s Office laban sa mga suspek na kinilalang sina Dr. David Lai, 49, at Bruce Liao, alyas Songhua Liao, 41, kapwa residente ng Unit-4D One Central Tower, Makati City.
Naganap ang raid dakong alas-3:30 ng hapon kamakalawa sa Goldstar Medical Clinic and Pharmacy Corp. na matatagpuan sa Unit 501-506 5th floor, New Lasema Spa Building, Sampaloc Street, Makati City.
Sa ulat mula sa tanggapan ni P/Major Gideon Ines, ng Station Investigation and Detective Management, nagsagawa sila ng inspeksyon laban sa nasabing clinic matapos makipag-ugnayan kay Felipe Albayda Jr., ng Makati Health Department Incident Management Team Task Force COVID-19 kaugnay sa impormasyon sa nasabing establisemyento na may ilegal na aktibidad .
Nakumpirma rin na ang suspek na doktor ay naggagamot umano ng mga hinihinalang COVID-19 patients sa kabila ng kawalan ng lisensiya na magpraktis sa Pilipinas ng kanyang propesyon at kawalan pa ng permit to operate ng klinika.
Nang siyasatin ang klinika ay nadiskubre ang mga Rapid Test Kits para sa COVID-19 at iba pang medical paraphernalias kabilang ang swab sticks, vials at syringes at iba’t ibang kahon na naglalaman ng mga Chinese medicine na nasa capsule at tablet forms na pinaniniwalaang ipinuslit papasok ng bansa at hindi umano nakarehistro sa Food and Drug Administration (FDA).
May dinatnan pa ang mga operatiba na apat umanong pasyente at dalawang staff.
Naniniwala naman si Makati City Police Station chief, P/Colonel Oscar Jacildo na posibleng may kaugnayan ang operasyon ng nasabing klinika sa nadiskubreng underground clinic sa Fontana Leisure Park, sa loob ng Clark Freeport Zone, sa Pampanga noong Mayo 19, 2020.
Halos pareho umano ang operasyon ng dalawang underground clinic sa Fontana at sa Makati na posibleng iisa lang ang nagtayo nito at may iba pang mga nasa likod ng operasyon.
- Latest
