Matataas na kalibre ng baril, mga bala nasamsam sa senior citizen

Isinuplong ng kaalitang utol

MANILA, Philippines — Nadiskubre  ng pulisya ang sari-saring malalakas na kalibre ng baril at mga bala sa loob ng bahay ng isang senior citizen sa Makati City makaraang isumbong  siya ng kanyang kaalitang kapatid.

 Kinilala ang inarestong suspek na si Jose Gozar Samala, 69, isang retiradong empleyado ng bangko at nakatira sa Cabanillas Street, Brgy. La Paz, Makati City.

Nakumpiska ng mga pulis sa kanyang bahay ang isang Glock 9mm pistol, isang 380 Bersa pistol, isang 9mm Beretta pistol, isang calibre 22 rifle, pitong short magazine at tatlong long magazine ng mga bala para sa Glock 9mm pistol, 10 magazine ng bala sa cal. 380 pistol, tatlong magazine para sa cal 9mm Beretta pistol, isang beretta suppressor, apat na holster, 154 pirasong bala para sa cal. 380 at 50 pang bala para sa cal. 45 pistol.

Sa ulat ng Makati City Police, unang dumulog sa Police Community Precinct 2 ang kapatid na babae ng suspek at isinuplong ang pagkakaroon ng mga baril at bala ni Samala na walang kaukulang mga dokumento.

Nadiskubre sa ginawang paghahalughog ng mga pulis ang naturang mga baril at bala ngunit walang mailabas na dokumento ang suspek para sa mga ito.