Makati Subway project, aarangkada na!

MANILA, Philippines — Isinagawa kahapon ang ceremonial drilling ng kauna-unahang Makati Sub-way Project na makakatulong sa pagpapabilis sa biyahe sa Metro Manila.

Pinangunahan ni Makati City Mayor Abby Binay ka­sama ang kanyang ama na si dating Vice President Jejomar Binay at mga kinatawan ng mga ka-partner ng lungsod mula sa pribadong sektor ang seremonya bilang hudyat nang pagsisimula ng preparatory works para sa konstruksyon ng proyekto.

Iprinisinta ng alkalde ang isang scale model ng intra-city subway project sa unvei­ling ceremony na ginanap sa lobby ng ground floor ng Makati City Hall main building.

Ayon sa plano, kaila-ngang maumpisahan na kaagad ang naturang pro­yekto at makukumpleto ito sa taong 2023.

Ang Makati Subway ang  magiging kauna-unahang subway system sa bansa, na  isasagawa sa pamamagitan ng joint venture sa pagitan ng lungsod ng Makati at consortium ng mga lokal at banyagang investors at sakop ang  30-years concession sa consortium ng maintenance at repair ng coaches at ng control hub.

Sa nabanggit na proyekto ay mahigit sa 6,000 tra­baho ang malilikha nito at mas higit nitong magpapa­unlad ang ekonomiya ng lungsod.

Sa pamamagitan ng nabanggit na proyekto ay malalaki ang maitutulong nito sa transport system lalo na sa libu-libong mananakay upang hindi maabala sa matinding trapik na nararanasan sa Metro Manila.

Kaya aniyang magsakay ng hanggang 27,000 pasahero bawat oras sa bawat  direksyon ang Makati Subway.