Binatilyo, binaril sa lamay
MANILA, Philippines — Patay ang isang 18-anyos na binatilyo nang barilin habang naglalaro ng tong-its sa isang lamay kahapon ng madaling araw sa Tondo, Maynila.
Dead on the spot ang biktimang si Ericson Israel, ng Bldg.34 Aroma Compound sakop ng Brgy. 105 Tondo.
Pinaghahanap naman ng pulisya ang suspek na si Rico Canapin, alyas Ikong, residente ng Gawad Kalinga Aroma,Tondo.
Sa ulat ng pulisya, dakong alas-4:20 ng madaling araw nang maganap ang insidente sa loob ng Bldg. 15 Ground Floor ng nasabing gusali.
Nabatid sa testigong sina Mary Rose Galit at Edmar Nursali na bago ang insidente ay naglalaro sila ng tong-its kasama ang biktima sa isang lamay sa nasabing palapag ng gusali nang dumating ang suspek.
Nilapitan nito ang biktima at walang sabi-sabing binaril sa likurang bahagi ng kanyang ulo saka mabilis na tumakas.
Sa imbestigasyon, dating alitan umano ang dahilan o motibo sa pamamaril ng suspek sa biktima.
- Latest
