3 pekeng NBI agents, arestado
MANILA, Philippines — Iniharap sa media ng National Bureau of Investigation (NBI) ang tatlong lalaki na nagpapanggap na NBI agents sa isinagawang entrapment operation sa Pasay City.
Kinilala ang mga suspek na sina Ronald de Rosales, alyas Mat-Mat; Christian Maximo at Rolroyce Figue-rao, alyas John.
Ayon kay NBI deputy director for Forensic Investigation Service Spokesperson Ferdinand Lavin, nag-ugat ang pagkakaaresto ng mga suspek sa reklamo ng isang Chinese national na kanilang kinikilan ng umabot sa halagang P855,000 upang maayos ang kanyang kaso matapos itong maaresto ng Pasay police dahil sa kasong illegal possession of firearms at driving without license noong Setyembre 3.
Ang nasabing kaso ay kasalukuyan na umanong dinidinig sa korte at ang mga suspek ang nagkunwaring tutulong sa complainant upang maayos ang kanyang kaso sa pamamagitan ng paghi-ngi ng pera sa bawat transaksyon.
Inunti-unti umanong hi-ngan ng mga suspek ng nasabing halaga ang biktima hanggang sa magduda na ito at inalam sa tanggapan ng NBI kong totoong mga ahente ng ahensya ang mga suspect.
Dito na napag-alaman na mga pekeng NBI agent ang tatlo dahilan upang planuhin ang entrapment operation na nagresulta ng kanilang pagkakaaresto.
Makikipag-ugnayan din ang ahensya sa PNP dahil lisensyado umano ang mga baril na nakumpiska sa mga suspek na ginagamit sa kanilang maling aktibidad.
- Latest
