Bagong EPD director, itinalaga

MANILA, Philippines — Itinalaga kahapon bilang bagong acting director ng Eastern Police District (EPD) si Sr. Supt. Bernabe Balba matapos i-recall at ibalik sa Camp Crame ni P/Chief Supt. Alfred Corpus.

Si Balba ang siyang Deputy Director for Administration ng EPD na itinalagang OIC director.

Walang binanggit na dahilan kung bakit ibinalik sa Camp Crame si Corpus na halos dalawang linggo palang sa kanyang puwesto.

Nabatid mula kay National Capital Region Police Office (NCRPO) Director P/Chief Supt. Guillermo Eleazar, effective immediately kahapon ang kautusan ng liderato ng Philippine National Police (PNP).

Ayon kay Gen. Eleazar, desisyon ng national Headquarters ng PNP  ang pagbabalik sa Camp Crame ni Corpus at maging siya ay hindi alam ang dahilan.

Si Corpus ay dalawang linggo pa lamang sa EPD ay nakapagpasibak na ng ilang pulis na natutulog sa kanilang duty at iniiwan ang kanilang puwesto. Si Corpus din ang sumita sa ‘dugyot’ na Police Community Precinct sa San Juan matapos siyang magsagawa ng surprise visit.