MANILA, Philippines — Ipinamahagi ni Manila Mayor Joseph Estrada sa may 1,500 mag-aaral sa Bacood Elementary School ang ‘Erap All Star’ shoes kasabay ng pagbubukas ng klase kahapon.
Sa kanyang maikling pananalita, sinabi ni Estrada na titiyakin niyang mabibigyan ng sapatos ang lahat ng 280,000 estudyante sa Maynila bilang bahagi ng paglalaan ng pangunahing pangangailangan ng mga estudyante sa elementary at high school level.
Una nang ipinamahagi ni Estrada ang P5,000 cash sa 1,000 magagaling na estudyante upang pambili ng kanilang mga gamit sa paaralan at uniform.
Binigyan diin pa ni Estrada na gamit din niya ang ‘Superstar Shoes’ na indikasyon ng kanyang pakikibahagi at pakikiisa sa matagumpay na pag-aaral ng mga estud-yante.
Umapela si Estrada sa mga estudyante na mag-aral mabuti upang magkaroon ng maayos at maunlad na pamumuhay.
Iwasan lamang umano ng mga mag-aaral na masangkot sa usapin ng ilegal na droga upang hindi masira ang kanilang buhay at kinabukasan.