MANILA, Philippines — Patay ang isang lalaki na nasa drug watch list ng kanilang barangay makaraang malapitang barilin sa ulo ng apat na hindi nakilalang salarin, kamakalawa ng hapon sa Malabon City.
Nakilala ang nasawi na si Mamerto Velasquez, alyas Elmer, 43-anyos, may-asawa, pedicab driver, at naninirahan sa Acero Street, Brgy. Tugatog, Malabon City.
Sa ulat ng Malabon City Police, sakay ang biktima ng isang bisikleta dakong alas-3:45 ng hapon nang harangin ng apat na lalaki sa kanto ng Plata at Bronze Street sa Brgy. Tugatog, at saka barilin sa ulo.
Nabatid na kagagaling lang ng biktima sa kanilang barangay hall para sa pagdalo sa isinampang kaso sa kanya.
Patuloy na blangko ang pulisya sa pagkaka-kilanlan sa mga salarin bagama’t maraming nakakita sa krimen.
Ayon sa pulisya, ito ay posibleng dahil sa takot ng mga saksi na sila naman ang balikan ng mga kriminal sa oras na magsalita.