Bebot na ‘tulak’ arestado

MANILA, Philippines — Dinakip ng Manila Police District (MPD)-Police Station 6, ang isang babaeng hinihinalang ‘tulak’ ng iligal na droga sa isinagawang buy-bust operation sa San Andres Bukid, Maynila kamakalawa ng gabi. Naghihimas ngayon ng rehas si Arlene “Len-Len” Balceda, 37 at residente ng Radium St., San Andres Bukid, Maynila. Sa report ni Police Supt. Olivia Sagaysay, Station Commander ng MPD-Station 6, dakong alas-10:40 ng gabi nang naganap ang insidente sa Radium St., San Andres Bukid, Manila. Nauna nito, nagsagawa ng buy-bust operation ang Station Drugs Enforcement Team ng Station 6 (SDET-PS6), sa nasabing lugar na nagresulta sa pagkahuli sa suspek kung saan narekober sa kanyang posesyon ang anim na ‘sachet’ na naglalaman ng hinihinalang shabu. Kasaluku­yang nasa kustodiya ng MPD-PS6 si Balceda, at nahaharap sa kasong paglabag sa R.A 9165 (Comprehensive Dange­rous Drugs Act of 2002).