‘Ninja cop’, tinodas ng tandem

MANILA, Philippines -  Patay ang isang retiradong pulis na sinasabing  ‘Ninja cop’ na high value target (HVT), habang da­lawa pa ang nasugatan nang pagbabarilin ng hindi nakilalang mga  suspek sa Sta. Ana, Manila.

Dead-on-the-spot si da­ting SPO3 Dennis Padpad, 47, ng Silahis St.,  Sta. Ana, Manila  dahil sa 10 tama ng bala sa ulo at katawan.

Ginagamot naman sa  Sta. Ana Hospital si Har­kamal Preet-Singh, 23, In­dian national at si  Rick Jezriel Zamora, 22, na agad na isinugod sa pagamutan.

Sa report ni  Det.  Jef­frey Laus, ng Manila Po­­lice District (MPD)-homicide sec­tion, dakong alas-6:20 ng gabi nang maganap ang insidente sa SMJV Body Fitness na matatagpuan sa Augusto Francisco St., Sta. Ana, Maynila.

Nauna rito,  nag-eeher­sisyo ang biktima nang  pu­masok ang apat na suspek at walang sabi-sabing paulanan ito ng bala bago mabilis na tumakas sakay ng dalawang motorsiklo.

Hindi naman nakilala ang mga suspek na pa­wang nakasuot umano ng helmet.

Tinamaan ang dalawa pang biktima na nasa loob rin ng gym.

Ayon kay  P/Chief Ins­pector Romeo Estabillo, hepe ng Dagonoy Police Community Precinct ng  MPD-Station 6, si Padpad  ay dati umanong miyembro ng ‘Ninja cop’.

Huli umanong naita­laga sa Sulu si Padpad matapos ang internal clean­sing na isinagawa ng Phi­lippine National Police (PNP) sa mga tauhan nito na nag-early retirement noong nakaraang taon.

Nabatid na ang mga ‘Ninja cop’ ay iyong mga pulis na sangkot umano sa aktibidad ng ilegal na droga.