MANILA, Philippines - Patay ang 45-anyos na tiles installer matapos itong mahulog mula sa ikalawang palapag habang umiinom ng alak kahapon ng umaga sa Caloocan City.
Basag ang bao ng ulo ng biktimang si Manuel Danila ng Liton Street, Litex Village sa Barangay San Jose, bayan ng Montalban, Rizal.
Sa pahayag ng nakasaksing si Lionel Paulino, naganap ang insidente bandang alas-6 ng umaga sa ikalawang palapag ng gusali sa panulukan ng Amugis at Taluto Street sa Amparo Subdivision, Brgy.179 sa nasabing lungsod.
Kainuman ng biktima si Ricardo Ladrillo kung saan nagpaalam ito upang sunduin ang kanyang asawa.
Gayunman, naiwang mag-isa sa inuman ang biktima subalit ilang sandali ay bigla na lamang nahulog mula sa ikalawang palapag si Danila at tumama ang ulo nito sa sementadong palapag.
Sasailalim sa autopsy ang bangkay ng biktima upang malaman kung walang foul play ang pagkamatay nito.