Nag-swimming sa baha: Totoy nalunod

MANILA, Philippines -  Nasawi ang isang 11-taong gulang na lalaki nang malunod sa tubig-baha na kanyang nilanguyan ka­sama ang ilang kaibigan, kamakalawa ng tanghali   sa Malabon City.

Nakilala ang biktima na si Justin Cesninos, alyas Kalbo, naninirahan sa  Brgy. Panghulo, ng naturang lungsod.

Sa ulat ng pulisya, nagkayayaan ang biktima at mga kaibigan nito na maligo sa mataas na tubig baha sa loob ng Artex Compound sa may Ro­d­riguez Street, ng naturang barangay, na dulot ng manaka-nakang pag-ulan.

Bigla na lamang uma­nong nalunod ang biktima dakong alaa-12:10 ng tanghali kaya agad na humingi ng tulong ang ibang bata.  Makaraan ang halos kalahating oras, naiahon sa tubig ang biktima.

Isinugod ito sa San Lo­renzo Ruiz Hospital ngunit hindi na naisalba ng mga manggagamot ang buhay ng bata makaraang makainom ng napakara-ming tubig.