MANILA, Philippines – Nagbanta ng malawakang tigil-pasada at protesta ang may 36,000 mga samahan ng taxi drivers sa bansa kung hindi aaksiyunan ng Land Transportation Franchising and Regulatory Board (LTFRB) ang hiling na kalusin sa mga lansangan ang pamamasada ng mga on-line for-hire vehicles tulad ng Uber,Grabcar at iba pang private car na gamit sa pamamasada sa bansa.
Ayon kay Fermin Octobre, national president ng Unite for Mass Progress Equality and Reality (DUMPER), lubha nang malaki ang pasakit sa kanilang arawang kita ang ginawang pagpayag ng LTFRB na makapasada ang mga on-line for hire vehicles gayung wala namang prangkisa ang mga ito.
Sinabi ni Octobre na sila pang mga lehitimong drivers na may franchise at nagbabayad ng buwis sa gobyerno ang hindi bigyang pansin ng pamahalaan, gayung sila ang legal na namamasada sa mga lansangan.
Binigyang diin nito na dahil sa Uber,Grabcar at iba pang on-line fore hire vehicles na kinabibilangan ng mga private vehicles, tumindi na ang dami ng mga sasakyan sa kalsada na nagpapadagdag sa matinding trapik at nagpahina sa kanilang kita.
Ani Octobre, kaalinsabay ng protesta ay magsasampa sila ng petisyon sa LTFRB laban sa mga Transportation Networks Vehicles Services (TNVS) tulad ng Uber at Grabcar at hihilingin din sa ahensiya na alisin na ang P5.00 discount sa kabuuang bayad sa metro sa taxi.
Sa ngayon anya ay nagsasagawa ng pagpupulong ang mga kasapi ng mga legitimate taxi drivers para isapinal ang pormal na pagkilos laban sa TNVS.
“Exhaust muna namin lahat ng legal means at kung wala ng ibang recourse, as much as possible gusto namin sa maayos na paraan pero kung walang mangyari sa petition namin, nagkaisa ang lahat ng 36,000 taxi drivers nationwide na lumabas na ng kalye upang ipakita ang lakas ng mga taxi drivers, kaya magpipirmahan kami sa darating na meeting,” pahayag ni Octobre.
Una nang nagpahatid ng kanilang suporta ang malalaking samahan ng transport group na kanselahin na ang accreditation ng Uber, GrabCar at iba pang TNVS na nagbigay sa mga itong magsakay ng pasahero kahit na ang kanilang mga sasakyan ay pribado.