MANILA, Philippines - Tatlo katao, isa dito ay babae ang iniulat na nasawi makaraang ambusin ng apat na armadong kala-lakihan kahapon ng madaling araw sa lungsod ng Caloocan.
Patuloy na inaalam ng pulisya ang pagkakakilanlan sa mga nasawi makaraang walang makuhang anumang dokumento sa mga ito.
Inilarawan ang mga nasawing nagmamaneho ng maroon Nissan Navarra Frontier (NUI 501) na nakasuot lamang ng boxer shorts, walang damit pang-itaas, nasa 30-35 anyos, at 5’7”-5’8” ang taas; ang babae na may edad 20-25 anyos, nasa 4’9”-5’0” taas, at nakasuot ng pulang jacket at dilaw na shorts; at isa pang lalaki na may edad 20-25 anyos, nasa 5’4”- 5’6”, at may suot na puting t-shirt.
Sa ulat, dakong alas-3 ng madaling araw nang pagbabarilin ng higit sa apat na salarin ang mga biktima nang makorner ang mga ito sa may Talipapa, Pili Street, Brgy. 178 Camarin, ng naturang lungsod. Ayon sa mga residente, gumanti umano ng putok ang mga sakay ng pick-up bago napaslang ang mga ito.
Ngunit palaisipan naman na walang armas na nakuha sa loob ng sasak-yan ng mga nasawi, walang anumang dokumento sa pagkatao ng mga biktima at kung bakit boxer shorts lang ang suot ng isa sa mga ito. Hinihinala na maaaring tinangay ng mga salarin ang armas at iba pang gamit ng mga biktima bago tuluyang tumakas.
Patuloy ang imbestigasyon ngayon ng pulisya sa insidente kabilang na ang pagtukoy kung kanino nakarehistro ang pick-up truck para makakuha ng lead sa pagkakakilanlan ng mga nasawi.