MANILA, Philippines - Mahigit sa 6,000 kabataang mag-aaral mula sa iba’t ibang barangay sa district 1 hanggang district 6 ang nakatanggap ng libreng school supplies mula kay Quezon City Vice Mayor Joy Belmonte sa ilalim ng ‘Joy of Public Service program’.
Partikular na naisagawa ang pamamahagi ng school supplies tulad ng bags, papel, notebooks, lapis, cra-yons, pencil case at iba pa sa mga covered court ng barangays Kamuning, Quirino 2B, Paltoc at Bernardo sa Distcrict 1, 3 at district 4.
Sinundan naman ito ng pamamahagi ng school supplies sa covered court ng barangays Gulod, Baesa, Tandang Sora at Commonwealth sa district 2, 5 at district 6.
Ayon kay Belmonte, taunang naisasagawa ang programa upang makatulong para maibsan ang gastusin ng mga magulang sa kanilang mga anak na magsisipasok ngayong darating na pasukan sa Lunes.
Bago ito, nakipagkoordinasyon din ang tanggapan ni Belmonte sa mga public schools sa lungsod upang makatulong sa pagsisinop ng mga silid- aralan na gagamitin sa pasukan sa ilalim ng ‘Brigada Eskuwela’ ng Department of Education.
Dito, nagkaloob din ng mga cleaning materials at pagkain ng mga magulang at guro ang tanggapan ni Belmonte na nagsasaayos at naglilinis sa mga silid-aralan.