MANILA, Philippines – Hinihinalang atraso sa isang sindikato ang dahilan ng pamamaril sa isang lalaki na miyembro umano ng Commando Gang, kamakalawa ng madaling araw sa Caloocan City.
Nagtamo ng tama ng bala sa may panga ang biktimang inilarawan na nasa edad 25-30, nasa 5’4” taas, nakasuot ng gray na kamiseta, maong shorts, may tattoo na “Enrique Gatdula” at “Commando” sa likuran.
Sa ulat, nakatayo at mistulang may hinihintay ang biktima sa may kanto ng Malolos Ave. at Konsehala Alley sa Brgy. 154, Bagong Barrio, ng naturang lungsod, nang dumating ang mga hindi nakilalang salarin.
Nakipag-usap pa umano ang biktima hanggang sa barilin na ito ng salarin. Wala nang buhay nang matagpuan ng mga otoridad ang biktima sa naturang lugar habang nakatakas na rin ang mga kriminal.
Patuloy namang blangko ang imbestigasyon sa insidente ng pulisya dahil sa kawalan ng testigo.