MANILA, Philippines – Umaabot sa 350 mga aplikasyon 0 mahigit 700 mga unit ng bus ang nabigyan ng special permit ng Land Transportation Franchising and Regulatory Board (LTFRB) para sa mga Metro Manila buses na papasada sa mga lalawigan ngayong holiday season.
Ayon kay Atty. Ariel Inton, board member ng LTFRB, epektibo mula kahapon ay maaari nang magamit ng mga bus unit ang kanilang special permit para makapasada sa mga lalawigan para maghatid sundo sa inaasahang dagsa ng pasahero na uuwi sa kanilang mga probinsiya ngayong Kapaskuhan.
Ang special permit ay tatagal hanggang Enero 3.
Kaugnay nito, inabisuhan ng LTFRB ang mga terminal owners na bigyan ng sapat na akomodasyon ang mga pasahero tulad ng pagkakaroon ng mga first aid station at malinis na mga palikuran na libreng gagamitin ng publiko.
Ang special permit ay taunang naipagkakaloob ng LTFRB sa mga Metro Manila bus o sa anumang okasyon sa bansa upang ayudahan ang mga pasahero na pauwi sa mga probinsiya ngayong kapaskuhan.